- 577 -

1427. Juli 10. Liegnitz.

Herzog Ludwig ertheilt der Stadt Liegnitz einen Freiheitsbrief für die gegen die Ketzer Böhmens geleistete Hülfe.

Wir Ludowig von gotes genaden herczog in Slesien czum Brige vnde czu Lignicz bekennen vnde tuen kunth vffuntlichen mit diesem briue allen den die een sehn adir horen lesin, alz dann vnsere liebin getruen burgermeyster, rathmanne, eldesten, gesworen vnde die gancze gemeynde vnser stat Lignicz vns zu vnser merglichen notdorft vnde dorch vnsere vleyssigen bete willen czu erhaftigen sachin vornemlichen vnseres kawffes des landis vnde stat Streleyn mit tawsand marken groschen an gereytem gutem gelde ganz wol czudanke czuhulffe vnde czu stewre komen seind, die sie vor vns dem hochgebornen fursten herczoge Kazomiro von Awswitczen vnde sienen reten czum Brige am neesten sonnobende vor sandte Walpurgis noch datum diesis briues gancz gutlich entricht vnde beczalit habin, sulches geldis tawsand mark obgenanter groschen vnde czal wir die obgenante vnsere stat Lignicz von vns vnde vnsere erbin gancz an allen ansproch qweyt ledig vnd los sagen nu vnde eweclich, vnde wenn dan die obgenanten vnsere rathmannen vnde die gancze gemeynde vnser obgenanthen stat Lignicz noch sulcher hulffe gote dem almechtigen czu lobe vnde czu eren vnde dem heyligen christenlichin glawbin czu sterkunge czu wedirsteen den vordampten ketczern czu Behemen, vns czu dinste vnde allen vnsern landen zu zukunftigem nutcze vnde czu enthaldunge gedrangis gutis gemeynes cristenlichens folkes vff den czog kegen Behemen wedir die ketczere mit fure, mancherleye speyse, hantwerke vnde mit erem reysigen geczewge, soldenern, dorczu donoch mit vierczege geweppeten schotczen vff dreye monden czu Hirsperg vnde an den greniczen czu rechter lantwere mit swerer kust vnde czerunge vns czu beheglichem willen vnde wolgefallin geduldiclichen willeclichen gedinet habin, domete wir sie groslichen besweret habin, hiervmb habin wir angesehn sulche manchfeldige true, hulfe vnd stewre vnde gancz aneme, willige dinste, die vns vnsere obgenante stat Lignicz ye getruelichin geleystet hat, domete wir sie besweret habin, also habin wir von furstlicher macht czu rechter wedirstatunge sulcher hulffe vnde stewre eris willigen dinstis sunderlichin gelowbet vnde mit rechten wissen glowben in guten truen an allis arg vor vns, vnsere erbin vnde rechte nochkomen herren czu Lignicz, daz wir noch sie, nu vnde czu ewigen geczeiten, vorbas keyne hulffe stewre noch bete von een noch von eynem iclichen besundern burger adir in woner czu Lignicz von vnsere schulde, landkewffen noch sust von kawffes wegen in welcherleye weysze adir satczunge daz were, wie die sunderlichen namen hetten, adir wie man die von gewonheyten adir von rechte irdenken vnde apgefordern mochte von der obgenanten vnser stat Lignicz burgermeyster, rathmannen, die gancze gemeyndh noch von eynem iclichen besundern fordern, nemen, abedrangen, heyschen, twyngen, beten adir schatczen wellin, sollen noch en mogen noch vorsagunge wir noch vnsere nochkomen czu vngehorsamen czu sachin sollin (!), sunder wir sie, wir, vnsere erben vnde nochkomen vorbas die obgenante stat Lignicz, die gemeynde vnd eynen iclichen burger vnde eynwoner besundern gancz dorumbe vnbetediget, vngedranget, vngeschatczt, vnbesweret vnde vngehyndert, allerleye bette vnd vngeldis frey vnd geruet lossin sollin. Ouch wenn wir dann eigentlichin betracht habin, das vnsere obgenante stat etwaz von eris selbis wegin czu swach gewest ist an gelde czu sulcher auszrichtunge, also haben wir sie geheyssen vnde vollemacht gegebin vnde gebin incraft diesis briues, sulch gelt zu sulchin sachin vff vnsere obgenante stat czunemen vnde vf sich czinse czuvorkewffin vnde czuvorschreybin mogen vnde wenne sie die vorkewffin vnde wie sie sich een dorumbe vorschreybin, gloubin wir von vns, vnde vnsere erbin in guten truen sulche vorschreybunge czuhalden vnd sulche kewffe dobey czulossin, wie sie sulche czinse gekauft habin noch lauthe erer briue, wie die von worten czu worten auszweysen, von vns, vnsere erbin gancz vngehindert. Ouch czu merer wedirstatunge, hulffe vnde dinste habin wir von furstlicher macht vorlegen vnde volkomene macht gegebin vor vns, vnsere erbin vnde nochkomen, ap sache were, daz ymand daz Lignitsche weychbilde mit wagen, pherden adir kauffmanschacze wie der namen hette, keyns auszgenamen, rurete, von sulchem gute, ware, pherde adir kawffmanschatcze vm sulche rare vnd czoll vorfarunge sal eyn iclicher beyde mit gerichte vnd czolle in die stat kegen Lignicz gehoren, vnde vnsere rathmannen czu Lignicz mogen sulche vorfarunge vnde landrure dez czollis, wo die in vnsern landen geschyt vnde wo sie sulche lewte adir kawffmanschacz ankomen ane rechtis forderunge, vfhaldin vnde allenthalbin gancz vngehindert von allin gerichten in vnser stat Lignicz treybin vnd furen vnde von een dorumbe an alle rechte snnder noch erem irkentenisse busse vnde wandil nemen, von vns, allen den vnsern, vnsern amechtleuten vnbetediget vnde gancz vngehindert. Ouch gebin wir den obgenanten vnsern rathmannen vnde vnser stat Legnicz vor vns, vnser erben vnde rechte nochkomen gancz volle gewalt vnde macht, daz sie alle vnde icliche vnser stat Lignicz geschossere erer guter vnde czugehorungen. welcherleye die weren, die geschossere in dem dornposche, alle ere czinse, genyesse, nuczparkeyte, gutter, die sie itczund ynnehaben, halten gemessen vnde gebruchen, vleyschbenken geschossere, wie sulche gutter adir czinse vnd tegeliche geniesse vnde satczunge sunderlichen namen haben, die sie auch itczund adir vormols czu erer bestin nutcze gemachet haben, daz die obgenante vnsre rathmannen vnser stat Legnicz an allin vnderscheyt ordin, schickin, abelegen, vornewin vnde an eren vnd der stat bestin nucz wenden mogen vnde die vorbas also halten gebruchen sollin vnde mogen von vns, vnsern erben vnde nochkomen vnde allen vnsern amechtlewten gancz vngehindert nu vnde ewiclich vnde vorczeien vns kegin een vor vns vnde vnser erben vnde nochkomen aller ansproche, heyschunge vnde forderunge aller vnde iclicher renten vnde geniessen, die sie ynne habin, halten vnde besitczin adir die sie macheten adir wir in vnser obgenanten stat czu machen meyneten, sunder alleyne auszgeczogen die lozunge vnsere erbgeschosse vnde munczegeldis, das wir doruff vorsatczt habin, wenn wir daz vormogen, die wir vns vnde nicht meer renten vnsern erbin vnde nochkomen behaldin an vnser obgenante stat vnde czugehorunge czuhabin, dorum wir vns auch sollin lossin benugen. In craft dieses briues czu rechtem bekentenisse mit vnserm grossen anhangenden ingesegile vorsegilt. Gebin czu Legnicz am donerstage vor sandte Margarethen tage noch Cristi gebort vierczenhundirt vnde donoch in dem sebenvndczwenczigsten jare. Dobey sind gewest vnsere liebin getruen her Henrich Ole, Henrich Gebelczke, Conrad Hoeberg, Bernhard von Czedelicz vnde Johannes Bawde vnser schreiber, dem dieser briff befolin warth.

O. d. St. L. No. 321. Das Siegel an Schnüren von rother Seide. — Bitschens Privilegb. f. CLXXIb. — Dessen Geschossbuch f. 27.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866